كواكب الأدب - مجلة عراقية أدبية ثقافية - نجاح ناجي اللوزه (تزوير )
الى الذي قال انه ( حاصل على شهادة الماجستير في حب الامام الحسين عليه السلام )
( تزوير )
~~~~~~~~~~~~~~~~
عمت عين الوكت خله الردي يعله
و أبعد كل شريف الما رضه بذله
خالفوا حتى الشرع والدين والمله
وصار عدنه النهب بالبلد صوبين
لأن ماخذ شهاده بحب الحسين
~~~~~~~~~~~~~~~~~~~~~
يكول أنا الشرف و الزود و النخوه
أنا بس إلي يحله الحكم والسطوه
و من غير النهب الدنيا و شتسوه
شحلات العمر من تمتلي الجيبين
لأن ماخذ شهاده بحب الحسين
~~~~~~~~~~~~~~~~~~~~~
صفه تالي البلد لأهل الدجل والعارات
وعلى حساب الشعب تتوقع الصفقات
وشوف إبن الفقير العاش بالحسرات
و حاط إبنه بالدول يلعب على الحبلين
لأن ماخذ شهاده بحب الحسين
~~~~~~~~~~~~~~~~~~~~
بين ليله ويوم سياسي صار بالصدفه
بعد ما جان دايح بالدول ويدور اللفه
نسه روحه بالحدايق جان من يغفه
و هسه صاير طول إلسانه مترين
لأن ماخذ شهاده بحب الحسين
~~~~~~~~~~~~~~~~~~~~
ذب القاط بيهم و لبس العمامه
كثر عنده الرصيد وتاهت أرقامه
هم جذاب و الله و زادت أفلامه
طالع هل الوكت بعمامه طولين
لأن ماخذ شهاده بحب الحسين
~~~~~~~~~~~~~~~~~~~~
كافي يا شعب لا تقبل الذله
زمان الخوف صدك راح إو وله
بعد ما راح منه العنب والسله
وغرك بينه العراق اليوم بالدين
دمرنه الماخذ شهاده بحب الحسين
~~~~~~~~~~~~~~~~~~~~~~
نريد الشهم إبن الخير و الملحه
ونريد إبن الاصل للمايل يصلحه
عراقي و أكل من زاده من ملحه
علماني نريده و يحترم للدين
ومن أهل العلم ويقتدي بحسين
~~~~~~~~~~~~~~~~~~~~
نجاح ناجي اللوزه
تركيا ................ ٢٠١٧
تعليقات